Tildeling av rekrutteringsmidlar frå Dextra Musica 2026

No er tildelinga klar. 14 prosjekt har fått rekrutteringsmidlar for 2026 frå Dextra Musica på totalt 1 000 000 kr.

Rekrutteringsmidlar frå Dextra Musica er no fordelt. Til søknadsfristen 30. januar kom det inn heile 21 søknadar med total søknadssum på 2 040 700 kr.

1 000 000 kr til 14 prosjekt

FolkOrg har sidan 2017 delt ut midlar til større rekrutteringsprosjekt innan folkemusikk og folkedans i Noreg. Midlane er gjeve av Sparebankstiftelsen DNB og Dextra Musica. FolkOrg har vorte tildelt rekrutteringsmidlane i fleire rundar. Den siste tidelinga kom sumaren 2023, då FolkOrg fekk tildelt midlar for tre nye år (2024-2026).

Årets tildeling er på 1 000 000 kr. I år kom det inn 21 søknadar og FolkOrg har vedtatt å tildele midlar til 14 rekrutteringsprosjekt. Desse er:

• Bergen Ungdomslag Ervingen Dansefolk og folkedans - kr. 90 000
• Bø juniorspelemannslag Lifjell rundt 2028 - kr. 70 000
• Folkemusikkscena Røros FolkRekrutt Røros - kr. 55 000
• Geilo spelemannslag Folkedans i skulane og helgeøvingar - kr. 100 000
• Kalottspel KulturverkstadFOLK - kr. 30 000
• Sogn og fjordane folkemusikklag Folkedansespor - kr. 70 000
• Spelemannslaget Laust & Fast - kr. 30 000
• Spelemannslaget i BUL Steinkjer Jubileum og rekruttering i 2026 - kr. 55 000
• Teateret i Berget det Blå Dansen i Berget det Blå - kr. 90 000
• Tragder - kr. 70 000
• Vest Agder folkemusikk- og folkedanslag Folkløft Agder - kr. 110 000
• Valdres folkemusikkarrangement Strunkeveko 30 år - kr. 110 000
• Verdal juniorspellmannslag Ungdomssatsing i Verdal juniorspellmannslag - kr. 70 000
• Voss spelemannslag Song og danseopplevingar - kr. 50 000

Om ordninga
Rekrutteringsmidlar frå Sparebankstiftelsen DNB og Dextra Musica skal gå til større rekrutteringsprosjekt innan folkemusikk- og folkedansopplæring i Noreg.

Eit av hovudmåla med denne stønadsordninga er å hjelpe i gang solide rekrutteringsprosjekt som fører til varige tilbod. Prosjekta det søkjast midlar til må difor ha ein tydeleg intensjon om langvarig aktivitet og ein plan for vidare drift etter at stønaden frå FolkOrg er avslutta. Prosjekt som kan vise til godt gjennomført prosjektår blir prioritert ved neste års tildeling. Dette blir gjort for å skapa ei føreseieleg utvikling for prosjekta.

Stønaden vil deretter gradvis bli trappa ned, og FolkOrg forventar at prosjekta frå starten av jobbar målretta for å sikre vidare finansiering etter at stønaden frå FolkOrg og Dextra Musica er avslutta. Les meir om ordninga her: Rekrutteringsmidlar frå Dextra Musica Lenke til et annet nettsted.

Om Sparebankstiftelsen DNB og Dextra Musica
Sparebankstiftelsen DNB er ei uavhengig stifting som eig rundt 8 prosent av aksjane i DNB. Utbyttet frå desse aksjane brukast til ulike samfunnsnyttige prosjekt, mellom anna Dextra Musica. Sparebankstiftelsen DNB og Dextra Musica har over fleire år støtta tiltak som bidreg til at unge utøvarar får inspirasjon av musikarar på høgt nivå. Målet er å skapa neste generasjons musikarar og musikkentusiastar innan klassisk musikk og folkemusikk.

I tillegg til å støtte arbeid for barn og unge, har Dextra Musica ei av verdas fremste samlingar av strykeinstrument, som dei låner ut til etablerte og talentfulle norske musikarar innan folkemusikk og klassisk musikk. Dei har dei siste åra også inkludert langeleikar i samlinga. Les meir om arbeidet til Sparebankstiftelsen DNB og Dextra Musica her: Instrumentsamling Lenke til et annet nettsted.

Foto frå prosjektet Dansen i Berget det Blå.