Det går ei folkemusikk- og folkedansbølgje over heile landet, og det er gledeleg å registrere at oppslutninga kring feltet vårt når stadig nye høgder. Det er truleg fleire årsaker til det, men merksemda i media, mellom anna gjennom NRK-serien Trollstemt, har nok bidrege til at fleire har fått auga opp for vår eigen, særeigne  kulturarv. 

Riksscenen og Tuvas blodklubb har og hatt stor innverknad på at folk i hovudstaden har oppdaga folkemusikkmiljøet som eit spanande, eksotisk og inkluderande miljø som er ope for alle. Små og store heilårsarrangørar har stadig meir folkemusikk og folkedans på konsertprogrammet. Utdanningsinstitusjonane bidreg til at fleire vågar å satse på  folkemusikk og folkedans som leveveg og som gjennom fordjuping i eigen tradisjon, men og  i ulike sjangerovergripande konstellasjonar, når ut til eit veksande publikum over heile landet. Norske tradisjonsutøvarar får og stor merksemd internasjonalt, og blir stadig engasjerte på turnear og  festivalar over heile verda. Det var stor stas å oppleve mottakinga og begeistringa for dei seks artistane som representerte Noreg i Glasgow i januar i år under Showcase Scotland og Celtic Connections. 

Lokallaga er sjølve grunnmuren i FolkOrg, og svært mange lokallag driv godt og målretta lagsarbeid, spesielt med tanke på aktivitetar for barn og unge. Samarbeidet med Dextra Musica har stimulert til mange gode rekrutteringsprosjekt, og vi er svært glade for at Sparebankstiftelsen har gått inn med nye, friske midlar til vidare satsing dei neste åra. For at barn og unge skal halde fram med song, spel og dans også etter at rekrutteringsprosjekta er avslutta, er ein avhengig av at det er lokallag rundt om i landet som kan tilby eit aktivt og levande miljø det er moro å vere ein del av. 

Alt lokallagsarbeid avheng av lokale eldsjeler som er viljuge til å bruke tid og kreftar på dette viktige arbeidet, og vi må  legge til rette for at det skal vere attraktivt å vere med i spel- og dansarlaga slik at ein held oppe aktivitetane og oppslutninga kring feltet vårt over heile landet. 

Det var stor deltaking på både Landskappleiken på Gol og Landsfestivalen i Vestnes, og vi kan gle oss over to solid gjennomførte og svært trivelege arrangement. Ekstra gledeleg var det at båe arrangementa gjekk med millionoverskot! Og når Kulturdepartementet i tillegg har gjeve oss ein ekstra million i driftstilskott øyremerka arbeid med Landskappleiken og Landsfestivalen i gammaldansmusikk, håpar vi det vil bidra til å inspirere og motivere lokallaga rundt om i landet til å ta på seg arrangementa når vi no har sendt ut invitasjon om å arrangere LK og LF dei neste åra. 

Tusen takk til dei to arrangørlaga, Gol Spel- og dansarlag og Møre og Romsdal folkemusikklag, for vel utført jobb og for at de tok på dykk desse store arrangementa! Vi nyttar samstundes høvet til å gratulere kongepokalvinnaren i vokal folkemusikk, Synnøve Brøndbo Plassen.  

Under Landskappleiken på Gol, vart det utnemnt eit nytt heidersmedlem i FolkOrg, som har lagt ned ein betydeleg innsats for vokaltradisjon gjennom ei årrekke. Vi sender varme gratulasjonar til  Eli Storbekken!

Folkelarm har verkeleg funne si form som eit stort bransjetreff for norsk, nordisk og samisk folkemusikk. Det  er ein populær og viktig møteplass for folkemusikarar og -dansarar, delegatar, arrangørar og eit svært interessert og engasjert publikum som møtast på Riksscenen midt i Oslogryta. Den store folkemusikkhelga blei innleia med finalekonsert i IntroFolk, som gjekk føre seg torsdag kveld, og det var til slutt Martin Steinum Brun som trekte det lengste strået og som fekk utnemninga Årets unge folkemusikar 2025.   

Folkelarmprisane blei delt ut laurdag og er ein viktig heider til alle dei dyktige folkemusikarane og deira plateselskap som gjev ut folkemusikk av høg kvalitet kvart einaste år. Den gjeve prisen Årets folkemusikar blei i år tildelt Tuva Syvertsen, og vi gratulerer ho og alle andre prisvinnarar!  

Vi jobbar heile tida med å betre rammevilkåra for Folkorg og våre medlemmer, og nyttar alle moglegheiter til å påverke sentrale styresmakter, både gjennom høyringar og i direkte møte med politikarar. Vi deltek og aktivt på ulike kulturarenaer og i kulturdebattar. Dette er viktig arbeid for å synleggjere at vår sjanger skal og må ha sin naturlege plass i det norske kulturbiletet og med rammevilkår ein kan leve med.   

Takk til dykk alle, både yrkesutøvarar og amatørar, lokallag, heilårsarrangørar og festivalar, som gjennom dykkar engasjement og betydeleg frivillig innsats, bidreg til å skape merksemd og interesse for folkemusikken og folkedansen. 

Eg ønskjer dykk ei strålande jule- og nyttårsfeiring med familie og vener, god mat og drikke og ikkje minst mykje god musikk og dans!

Hilde Reitan
styreleiar i FolkOrg